बर'नि थै दं होनलाय नोंनावबो...?
--- पुरन' ब्रह्म
बर’नि थै दं होनलाय नोंनावबो…?
बर’ जानानै जेरै जोनोम मोनबाय
बर’ जानानैनो थैलांनो हामारगोनदा नों ?
नोंनि आगान नोंनि सिमां
बर’खौ लानानैनो बर’नि थाखायनोमारदा.. ?
बर’खौ गेरेमसा माहारि दानायनि
सदबांसा लादोंमोनना
सिमां होफैना नों गावनि स’नाथि लामासो खोलांदोंमोन..?
नुदोंदा नों..
बियादनि बेगर बिरफानाय
दान’बादि खुगा ब्लां ब्लां सिबोनाय बुब्लिखौ ?
फारफ्रोमनिफ्राय फैनाय बिस बियादा
दा जोंनि खांसोर आबादथिलियाव
सोमखोर सोमखोर बिफांनि बागानाव
दालाइ बिलाइ बिबार बिथ’आव
गोर लागोन, खर’ दैखांगोन ..!
आय’..! जोंनि खांसोर आबादथिलि
सिनायथि गोमामारगोन नामा नोंनि..!
सिरि थानाया जेंनानिफ्राय बारग’नायनि
साबसिन राहाब्लाबो
गासैबो समाव सिरि थानानै
नों बबे जेंनाखौ सुस्रांनो..?
नुदोंदा नों..
बे हायेनाव खुद्रिसार हान्जा सुरनांदों
जोंनि अनजाथाव फरायसाफोराबो..?
बिसोर मोनदांदों : बिसोर समखिखांदों
बर’ जानानै थांनानै थानांगौखौ…
बिसोर मिथिगौ..
बे हायेन, बे आबादथिलियाव दं
मोदै आरो गोलोमदैनि मोगथांखोर जारिमिन ;
नांगोल आरो ट्रेक्टरनि हा फोमोननायाव
आंगो आबादारिनि बे स’नाथि आबादथिलियाव
बारजों बिरबोनाय बिस बियादखौ
लामानिफ्रायनो बेंथानो नों गसंगोनदा
खोमथा इन्जुर जानानै ?
सारलागोनदा नों
बिस सारफावनाय जोंनि बागानाव
स्प्रेयार लानानै बियाद फोथैनाय मुलि ?
बर’नि थै दं होनलाय नोंनावबो…?
बर’ जानानै जेरै जोनोम मोनबाय
बर’ जानानै थैलांनो हागोनदा नों ?
🔶🔶🔶
