* जिउनि बेलासि बुब्लियाव *
- फुलेस्वरी स्वरगियारि
नै रुंसारि आगदारि नों मुगानि ,
नोंनो आंनि थैस’ थांस’ लोगोरि ।
नोंनि सायख्लंयाव आं माबोरै जिरायबावगोन,
गैया माथो गोजोन बोथोरनि सुदेम बारहावा
नों थेलांनाय बान्दोआ बायलांनो हमबाय ।
नोंनि उनजोलै फिसा आरो आं
दिनै जानांदों हालाय-हाफाय —
बुंनाय बाथ्रा गोर्लै नङा ,
नै जिउनि लोगोरि नों आगदारि —
हागोनदा आंखौ-फिसाखौ रैखाथि होनो ??
गले गले सोंहरगोन आं नोंनियाव,
नों बबेहाय दं ? नों बबेहाय दं ??
सोरगोआव ना फाथालाव, सध्यमाव ना हादाबाव ;
मोनदोंबोला नों मान बान्था !
हाय, दिनै आं गसंनांगोन,
कानुननि दंफांनि फिनज्रायाव ।।
हागोनदा नों आगदारिनि मासियाव थानानै ,
बिजिरनो आंखौ गोथारै जास्तिस होनो ?
बोरै जाखो जिउनि लोगोरि !!!
जाथाय हरखाब खैफोद —
बबेनिफ्राय सोमजिदों लाजिथाव, मुगैथाव, सोनखारिथाव
सं दानगोनदा मुगानि आगदारि नोजोरजों ??
नोंनि जोलैखौ ? जोलैखौ ?? जोलैखौ ??
हे बिमा माहारि बिजिरनाया नोंसोरनि आखायाव ?
बि मोनारोम बिमानि आरो फिसानि –
सैथोनि लामाजों दांग्रोम-दांग्रोम,
बै हरनि जि रिंगासोनि ड’ नबेम्बर बुधबारायनि ।
दुथां आखुजों साजा होग्रा मा दायनि ?
बोरै मोनखो आइनखौ आखायाव गाव लानो ??
सरकारनि न’खथायाव दुथांयै जिउ लानायनि आवाज !!
नै बिमा माहारि, नै दैदेनगिरि —
खर’गंग्लायै खुथारै आरज आंनि,
थार बिजिरनाय मोन्नायनि,
बर’हारिनि गुबुंग्ले आबाहावाया गोथार जानायनि ।
दहाय, आफा बोराइ बाथौ- दहाय !
