Blog

बै सानखालि बेफोर आफादा बे जथाइ जथुमाव बाहागो लानायजों लोगोसे गोख्रों बिबुंथि होनायजों खौसे गारां बोनो थाखाइ गोरोबसे गोसो होनायखौ नुनानै बयनिबो गोसोआव गोजोन्नायखौ नुनो मोन्नाय जायो । अदेबानि, बे जथाइ जथुमखौ हांख्रायनानै जयै गोसो होनाय आरो लानायजों लोगोसे ट्राइबेलफोरखौ सांग्रां जानायनि खाबु होनायनि थाखाइ बागसा जिला ट्राइबेल संघखौ बयबो साबायखर बाउयो । बे बां जिलायारि आफाद जथाइ जुथुमखौ दैदेनदोंमोन — बि.ति.चि.नि बारग’ एम.चि.एल.ए.: अनिप बसुमतारि ।

मख’जाथाव गुबै बाथ्राया बेनोदि , बे जथाइ जथुमनि गेजेरजों ट्राइबेलफोरनि आथिखाल आरो इयुन मोन्थाइखौ नायनानै ट्राइबेलफोरनि सिनायथि फोरमानलाइ होनाय एबा लानाय समाव ट्राइबेलफोरा गावबा-गावनि गुदि आरो गुबै मुंखारिखौ लिरहोनाय जाथों होन्नानै बयबो खौसे मदद फोरमायो आरो बिथांखि आजावो ! लोगोसे, बे एखे आयदायावनो ट्राइबेलफोरनि मोनफ्रोमबो हारिमायरि आफादफोरनिफ्राइ खावलायनाय जाथों होन्नानै खावलायनो बिथांखि आजावनाय जायो ।

बे बाथ्राखौ लानानै जों बयहाबो सान्नाय आरो बुंनाय खालामनांगौ दंबादि मोन्नानै एसे नोजोराव खोख्लैनो लानाय जाबाय — ।
गुदिनिफ्रायसो बिजौ ! बेनिखायनो जानोहागौ जों, गुदि गैया ; बिजौ गैया, जेबो सिनायथिनि गरंबो गैया होनजानो रावबो लुबैया !

जौगानायखौ सोलायनायजों लायोब्ला लासैनो गावनि गुबैथिया गोमायो ; गुस्लायनायजों लायोब्ला गुबैजों गोग्गाथाव सिनायथिनि गोजोर जौगाखांनाय मोन्नो हायो ! दायो जों, सोलायनायजों जौगानाय लानो ना गुस्लायनायजों जौगाखांनाय लानो … ? बे मोनसे गेदेर सोंथि …!

ट्राइबेलफोरा जौगानायखौ सोलायनायजों लानोब्ला गुदि आरो गुबै मुंखारिजों ट्राइबेल फोरमानलाइ लायाब्लाबो जेबो नङा ! नाथाइ, गुस्लायनायजों दावगाखांनाय लाबोनोब्ला गावबा-गावनि गुदि आरो गुबै होन्नानै सिनायथिजानाय मुंखारिजों ट्राइबेल फोरमानलाइखौ लानाया गोनांथार …!

दा, सोरबा सान्नो हागौ — सोलायनाया मा जाखो आरो गुस्लायनाया मा जाखो होन्नानै …..! एखेसो माथो होन्नानै बुंनो हागौ ! नाथाइ एखे नङा । सोलायनायजोंबो जौगानाय फैयो; नंगौ ! नाथाइ सोलायनायजों जौगानाय फैनायाव गावनि रोखोमसे गुबै हारिमुवारि महर,आसारखान्थिया थायाबो जानोहागौ ! बेनिखायनो, सिनायथिजाखानाय मोनसे समायना हारिया सोलायनायजों जौगानाय लाबोनो नाजानाय माने गोजोरथि गैयै गावनि गुबै महरखौ खोमानो आगान सुरनाय ! नाथाइ समायना हरिमु गोनां मोनसे हारिखौ रावबो बेबादि सोलायनायजों जौगानाय लानानै गावबा-गावनि गुबै महर आरो थाथिखौ खोमानानै लानो सिगांनाय नुनो मोना !

समायना हारिमु गोनां मोनसे हारिया जौगाखांनायखौ गुस्लायनाय खान्थिजोंसो लानो अरायबो जुजिथाबनायजों हांखुर जायो ! आरो बेनो गोनोखोयारि मुगायाव गोनोखोयारि खान्थिजों गनायजाथाव गोसोयारि मिजिंजों गावबा-गावखौ थार दावगाहोनाय ।

दानिया फैदो — बेयावनो गोजौआव लिरजानाय गाहाइ मुंलारिनि आयदाजों सोमोन्दो लाखिनानै सावरायदिनि — बेयाव बुंनाय दङदि, खौसे जथाइ जथुमनि गेजेरजों गासै ट्राइबेलफोरखौनो गावबा-गावनि गुदि आरो गुबै मुंखारिजों सिनायथि लानो खावलायनाय ! बाथ्राया रोखादि, गुबै दाहारनिफ्राइ सोलायनायजों जौगानो नाजानायनि मुङाव गावनिखौ गारनानै गोमालांनो नागिरनायखौ हमथानो नाजानाय ! बेनिथाखाइ, बां-आफादफोरनि मोनसे सांग्रांथि जथाइ जथुमनि गेजेरजों बयखौबो खावलायनो खावलायनाय ! बेयो मोजां बाथ्रा ; मोजां हाबाफारि , बयबो मानिलायनाया मोजां । नङाबा, सोलायनायजों जौगानो लानायावनो गावबा-गावनि गुबै हारिनि सिनायथिया गोमालांनानै दाउखाया दाउराइ जानायनि सल’बादिसो जागोन !

बेनिथाखायनो जों, दावगाखांनो गुस्लायनायनिसो गोनांथि जायो ! सोलायनानै गावनि गुबैथिखौ खोमानो नङा …. !
माने …. जों, बयबो गावबा-गावनि गुबै सिनायथिनि मुंखारिजों गावबा-गावनि संबिजिदारि मोन्थायफोरखौ गोजोर मोनफुंनो हानायनि गेजेरजोंसो जौगाखांनायजों उदाङै थांना थानांगोन ! नङाबा गासैखौबो सेख’जागोन ….!!!

थार गुबै सिनायथिजों थार मोन्थायखौ मोनफुंहानाया गोजोर अरायनि थाखाइ जायो — !